曼聯成盤散沙點創奇迹？

猪拉多纳

上周中嘅歐洲賽事，英超球隊無一獲勝，其中號稱「工程師」嘅比歷連尼更計錯數，故意喺足總盃留力以求反勝巴塞，最終搞到兩頭唔到岸，四線爭霸美夢落空。嚟到今晚「超級星期天」，一場係英格蘭國家打吡－曼聯Vs利物浦，另一場係傳統嘅北倫敦死敵碰頭－熱刺Vs阿仙奴，頭6名球隊互撼，失分難免。喺比歷連尼同埋莫連奴心目中，當然期望「紅軍」同埋「兵工廠」失分，等前4隊分數唔使咬得咁緊。
紅軍SSS組合可怕

「紅軍」踏入2014年可謂順風順水，以佢哋嘅人腳及後備力量，足總盃出局反而有利喺英超爭霸，近期聯賽9場不敗令班波唔單止穩住前4，仲保持一定嘅爭標機會。上輪英格蘭對丹麥嘅熱身賽，「紅軍」5子代表英格蘭正選上陣，更係外界對利物浦今季優異表現嘅嘉許。「紅軍」喺餘下賽程頗為有利，因為未來面對直接嘅競爭對手，好似熱刺、曼城、車路士，全部都喺晏菲路出擊。要知道佢哋今季聯賽主場14戰，有11場可以攻入兩球或以上，當中阿仙奴同埋愛華頓就見證過晏菲路嘅可怕。「紅軍」嘅「SAS組合」更逐步發展為SSS（蘇亞雷斯、史杜列治及史達寧），令對手更加難以防範。

風水輪流轉，利物浦對上一次喺3月中聯賽分數高於曼聯，要數到1991年，嗰陣英超仲未成立，而英超史上從未試過有球隊，喺剩番10輪比賽多失11分仲攞得到歐聯資格嘅先例。事實上，要創造奇迹係需要有上下一致嘅信念，喺費爵爺年代嘅曼聯，總有一份打不死精神，化腐朽為神奇；但嚟到莫耶斯接掌嘅「紅魔」，則由始至終未能畀到人一份團結共患難嘅感覺，下季若果無歐聯打，話唔定個個都會做逃兵。睇睇尹佩斯同朗尼喺場內零交流，就算前者表明同莫帥合作愉快願意留低，但你會相信嗎？

（now621台周日晚9:30直播）