教練投降士氣曳 羅馬弱勢難發甸

猪拉多纳

今晚意甲阿二羅馬、阿三拿玻里分途出擊，兩軍聯賽爭標機會名存實亡，羅馬教練魯迪加西亞「扯白旗」，承認只能為亞軍而戰，實在令人洩氣。呢支首都球隊近期更備受傷停問題打擊，迪羅斯、史杜特文、馬爾干今仗皆缺陣。羅馬士氣弱、人腳不整，主場讓唔起烏甸尼斯，趁機博2.95倍讓球客勝。

（TVB 301周二凌晨4時直播）

羅馬今季聯賽主場13戰獲得10勝3和，非常亮麗，或因而被高估，主W1.34倍實在過熱。其實羅馬不利因素纏身，首先上仗輸畀拿玻里後，捧盃機會大減，賽後教練魯迪加西亞承認，餘下目標係保住亞軍，直接進身下屆歐聯分組賽。主帥都講出呢種洩氣說話，試問仲點叫球員搏命？
烏甸尼斯乘勝搶分

另外，羅馬近期連番痛失大將，中場史杜特文受重傷，已提早收咧，迪羅斯、馬爾干停賽，令中後場實力大打折扣。就算托迪可復出，但呢位37歲老將今季經常因傷倦勤，水準亦大不如前，恐怕對球隊幫助唔大。烏甸尼斯上仗力挫AC米蘭，表現相當不俗，季初對住大勇嘅羅馬，都只係小負1球，更何況對手現時弱勢，烏甸有力全身而退。

拿玻里上周中歐霸盃作客不敵波圖，嚟緊周中次回合主場再鬥呢支葡萄牙勁旅，不容有失，今仗意甲作客拖連奴，或會有保留，建議要入球細。（TVB 301周二凌晨2時直播）