細盤2:1波膽做對沖

猪拉多纳

環顧今屆歐聯16強首回合，只有加拉塔沙雷對車路士之役冇分勝負，次回合仲有懸念，令今仗睇頭十足，焦點依然落喺車仔主帥莫連奴與愛徒「魔獸」杜奧巴同史奈達嘅正面交鋒。雖然莫帥曾兩奪歐聯，並多次帶隊殺入最後階段，包括連續3屆帶領皇馬躋身4強，不過領隊只限喺場外指揮，於場上拚搏始終係球員。
預咗莫帥打孤寒波

睇番杜奧巴同史奈達喺分組賽尾場合力踢走意大利班霸祖雲達斯，可見兩人不減當年勇，絕對不容小覷，就算車仔有主場之利，亦非秤先加拉塔沙雷太多。根據當前形勢，若果今仗打和0比0，車仔就可憑作客入球優惠晉級，既然唔使贏波都掂，以莫連奴算死草嘅性格，今仗一定防守行先大踢穩陣波，車仔後衞伊雲洛域、泰利、加利卡希爾及門神施治個個都身經百戰，Peter預計呢場波會非常緊湊，唔慌多波入，可敲細盤，如果驚佢哋頂唔住「魔獸」嘅神來之筆，不妨補番少少車仔贏2比1波膽做對沖。
紅魔仲有翻盤機會

至於企喺生死邊緣嘅曼聯，聽晚再鬥奧林比亞高斯，雖然首回合作客淨吞兩蛋，但論實力始終勝一籌，只要主帥莫耶斯向球員灌輸一種每場都當係決賽咁踢嘅心態，同埋忘記剛啱畀利物浦大炒嘅傷痛，無路可退嘅紅魔嘅翻盤可能性依然係有。
金句：名帥與愛將各為其主，好過睇戲！