史浩克有前冇後 皇馬半力「大」得起

猪拉多纳

今晚巴拿貝球場上演皇家馬德里對史浩克04嘅歐聯16強次回合賽事，皇馬首回合作客狂風掃落葉大炒史浩克六個一皮，就知雙方差距有幾大啦！不過皇馬呢個周末有場關乎西甲冠軍嘅國家打吡大戰，今晚冇必要去到盡，呢啲場合，都係撐個1.85倍入球大睇吓波就算數喇！

（有線62及202周三凌晨3:45直播）

皇馬首回合領先咁多，今仗好大機會收起啲主力，不過以艾斯高、謝斯洛迪古斯為首嘅一眾後備兵，為爭取表現一定喺主場球迷面前全力以赴，又點會係悶戰先？今季為球隊屢建奇功嘅謝斯洛迪古斯，入楔能力同埋門前把握力非常老練，有力喺史浩克身上拎到士哥。不過後防由華拉尼等久疏戰陣嘅球員擔正，失波就絕對唔出奇。
亨特拉爾4場入6球弗爆

史浩克04首回合大敗而回，為面子今仗Hea踢機會唔大，事實上佢哋火力唔差，前鋒亨特拉爾狀態大勇，近4仗入咗6球，差唔多包辦晒球隊近期入波。何況快翼法芬同奇雲保定都係能夠獨當一面嘅攻擊手，不容忽視o架！衰在史浩克後防有幾多漏洞，相信有睇首回合嘅球迷都好清楚，既然兩隊都有前冇後，唔捧大又捧咩呀？
首回合：皇客勝6:1