紅魔墮凡間咪怪莫耶斯

猪拉多纳

今晚兩場歐聯16強次回合，屬於一大一細格局！焦點自然係曼聯到底能否創造奇迹，反勝奧林比亞高斯。細鬼對於紅魔鬼絕地反擊嘅成功機會，抱悲觀態度，一來呢支英超褪色勁旅已失晒方寸，連點進攻都唔識，二來奧林比亞高斯今屆一路演出唔錯，既然有兩球在手，應會全力死守力保勝果。以莫耶斯嘅領軍功力，睇怕咬唔入呢支希臘球隊，入球細有得諗。至於多蒙特主場對辛尼特，似駁火格，要大盤。
奧林比亞高斯真材實料

曼聯一直以來人腳唔算頂級，但就有一股打不死精神，往往可於逆境下反勝。講到尾都係費格遜獨特魅力，令球員發揮出小宇宙，但佢退休之後，球隊即失去「神功護體」。因此，現時嘅曼聯只係表現出一支平庸球隊應有水準，都無謂太過怪責莫耶斯。紅魔鬼跌落凡間，冇晒「魔」法，試問又點創造奇迹呢？

奧林比亞高斯今屆憑真材實料打入16強，首回合亦係技術性擊倒曼聯，實力不在對手之下。希臘球隊最叻就係防守，事實上，防守比進攻容易，目前形勢正好畀佢哋發揮死守強項，曼聯要入波就更難。

另一場，辛尼特首回合主場輸2比4，依家已經冇包袱，可以豁出去一博，贏唔到波起碼贏番尊嚴。多蒙特主場威力強勁，進攻極具效率，辛尼特壓前主攻，更加啱多蒙特打反擊，會有更多空位入波，可望上演入球騷。