三箭夠合拍射爆首爾

猪拉多纳

曼聯剛於英超被利物浦技術性擊倒，完全唔夠打，查實啲莊家開平手盤，已經話畀你知作客嘅利物浦係高啲！足球世界有啲人唔到你唔服，費格遜用同一班兵可以贏冠軍，佢叻在用兵好，其實莫耶斯絕對唔係曳嘅教頭，但老費接班人呢個位始終唔易坐。肥叔對「紅魔鬼」始終有多少情意結，呢次佢哋喺歐聯主場對奧林比亞高斯力求絕地反擊，預期可以贏波贏盤，兼顧埋入球大。

今次揀場亞冠盃做重心，日職勁旅廣島三箭主場對韓職大軍FC首爾，論級數兩班波差距唔大，三箭冇乜大牌外援撐住隊波，但勝在成班兵夾慣夾熟，落到場好合拍，唔少行家仍視佢哋為日職頂級勁旅，主場出擊仍然值得信賴。FC首爾財政狀況麻麻，季前放走咗唔少主力，反映幕後人冇乜本錢大搞，呢次受讓平半都冇着數，今場可試上盤！

（now 671周三晚6時直播）
多蒙特歐聯嚟料

另一場歐聯賽事多蒙特主場對辛尼特，多蒙特於德甲已經冇得追，所以早就疊埋心水專心備戰歐聯，上場聯賽輸波唔使太介意，呢隊波的確係有料到，今次踢回正常水準可望大勝對手，再追多鋪大盤。

（有線62及202台周四凌晨3時45分直播）