喪攻奧林比紅魔好「大」鑊

猪拉多纳

「天才」想反勝要等奇迹

今晚歐聯16強次回合，曼聯喺奧脫福迎戰奧林比亞高斯。紅魔要晉級今仗最少要入兩粒，喺費爵爺年代，曼聯主場對歐洲2、3線球隊要贏2、3球簡直易如反掌，不過依家由「天才」莫耶斯領軍，啱啱先慘敗畀死敵利物浦士氣直插谷底，今晚想反勝出線隨時要等奇迹。既然紅魔別無選擇，一開波必定狂攻，今場當然首推1.72倍入球大啦！

（有線61、64及201、中央5台周四凌晨3:45直播）

曼聯啱啱喺英超雙紅會大敗於利物浦腳下，仲要畀紅軍球迷拉晒橫額寸莫耶斯係「天才」，咁鬼瘀睇怕佢個帥位唔坐得幾耐。曼聯今季組織多咗無謂嘅長傳，極易斷纜，而過量嘅兩邊傳中亦令對手容易防範。其實只要識得運用朗尼甚至香川真司組織，配合尹佩斯嘅走位同射手觸覺，要撕破奧林比亞高斯嘅防線唔係難事。
曼聯後防唔掂勁失波

不過「張峰」認為紅魔後防嚴重走樣先係最大致命傷，上仗對利記領紅嘅維迪，佢拍檔菲爾鍾斯同莊尼伊雲斯都係計時炸彈，加埋經常發波瘟嘅拉菲爾達斯華，就解釋到今季失球上升嘅原因，家陣仲有基斯史摩寧受傷要抖成個月，防線睇怕只會繼續走下坡。

奧林比亞高斯啱啱喺希甲擊敗彭夫雷高斯封王，奪得球會史上第41個聯賽冠軍，成班球員賽後喺更衣室瘋狂跳舞唱歌慶祝，士氣大振。中場艾真度杜明基斯受訪時仲話去奧脫福比賽嘅機會非常難得，家陣仲有望打入8強，所以呢場絕對係球隊整季最關鍵賽事，同班隊友一定會踢番場大激戰，答謝隨隊作客嘅3,500名球迷喎！
奧林比博入波唔死守

奧林比亞高斯喺分組賽力壓賓菲加出線，證明有一定能力。佢哋以前鋒沙維奧拿同美度古較為人熟悉，特別沙維奧拿走位靈活，屬於擅打反擊類型，今晚有力攻破紅魔大門o架！奧林比首回合淨勝兩球，假如今仗喺奧脫福入到1粒，紅魔就要入4球先出線，所以肯定唔會死守，實行同曼聯鬥攻啦！
Data King：曼聯主場近5戰1敗

‧曼聯近5仗主場僅1負。

‧曼聯近8仗半場全部開細。

‧奧林比亞高斯近10場作客只失5球。
乜都玩錦囊：紅魔半場8連細再追

曼聯今仗許勝不許敗，為咗面子一定用盡法寶，不過佢哋火力大跌Watt係不爭事實，雖然成日大手交易，但上半場就好似唔識入波咁，近8仗只得一場喺半場入過波，而半場大細亦已連續8場開細。既然有路好捉，不如試下1.45倍嘅「半場細」！
首回合：曼客負0:2