F組鬥獻「細」國安難炒水手

猪拉多纳

後防穿咗個大窿嘅北京國安（足智彩譯FC北京），今日喺亞冠盃F組主場迎戰澳職中岸水手，未必敢放膽進攻，就算贏波都會好吃力，揀1.72倍入球細比較正路。

（開賽時間：周三晚7:30）

亞冠盃兩連和嘅中超「老二」北京，呢排頭頭碰着黑，傷兵、停賽一件接一件，3個中堅入面，隊長徐雲龍剛啱康復，郎征就撕裂咗肌肉，好人好姐得個于洋。唔只咁，右後衞李雲秋養傷，本來可以移後嘅右中場周挺又坐波監，左閘人選張辛昕、李博軒隻腳都唔多妥，龍門楊智就停賽，成條防線真係甩皮甩骨。

後面散晒都不特止，中場河大成患咗感冒，前日已經冇操，前鋒格隆嘅腳傷就反反覆覆，一直未能痊愈，新主帥文沙奴真係巧婦難為無米炊，佢仲敢唔敢寄望借住地利搶攻贏波，大家估都估到。
同組三箭 首爾「細」均力敵

中岸水手係就係有後衞希頓摩頓、米高尼爾、前鋒卡華斯歷幾個話有傷，而且作客表現不嬲麻麻。不過佢哋件守將保斯拿踢過廣州富力，好清楚北京嘅底細，佢都點晒名話要提防北京件快翼烏塔卡，完全有備而嚟，北京想炒起水手諗吓就得，要付諸現實絕對困難，玩吓入球細算嘞。

同組嘅廣島三箭對FC首爾一樣格局，你咪睇首爾家陣排韓職尾二，佢哋喺亞冠盃表現硬淨，兩戰1勝1和，廣島就算有鋒線新兵柏好文復出，恐怕都入唔到太多波，1.65倍入球細咪嫌熱。

（now671台周三晚6:00直播）