薩爾斯堡團隊精神最可貴

猪拉多纳

Louis尋日凌晨欣賞咗皇家馬德里對史浩克04嘅歐聯16強次回合賽事，睇見基斯坦奴朗拿奴為咗刷新歐聯入球紀錄，罔顧嚟緊對巴塞隆拿嘅超級大戰，喺一場勝負已分賽事搏足全場，除咗入兩球之外，仲一次中楣一次中柱，搏到跣親嚇到教練安察洛堤標晒汗，賽後Louis真係明白到，皇馬同巴塞上屆歐聯點解雙雙喺準決賽大敗，原因係佢哋根本欠缺團隊精神。
Ｃ朗個人主義罔顧大局

Ｃ朗將個人榮譽放喺球隊利益之上，其實國際足協都係罪魁禍首，金球獎頒畀一個未能幫助球會取得任何成績嘅球員，間接鼓勵Ｃ朗嘅個人主義，又係嘅，即使皇馬未來幾年都攞唔到冠軍，責任都只會喺教練度，只要Ｃ朗願意續約，就可以長居球隊大哥大位置，甚至贏盡個人獎項，繼續做「無冕球王」。不過作為皇馬死忠fans嘅Louis，就覺得既然球隊上季一無所得，作為大哥大嘅Ｃ朗就更應該對成績肩負更大使命感，金球獎你都攞埋，宜家係咪應該要將幫皇馬攞番個冠軍放在第一位置呢？

講到團隊精神，奧甲球會薩爾斯堡就令人尊重，佢哋成班主力都係國腳級球員，但嚟到奧甲呢個小聯賽不但冇個人優越感，球隊近期聯賽贏到甩晒轆，班主力球員喺接受訪問時，都主動表示應該讓出機會畀年輕球員汲收經驗，等佢哋可以更專注為球會爭歐霸盃，薩爾斯堡首回合作客瑞士巴素利已經佔盡上風，最終互交白卷只係差多少經驗同運氣，今仗返到主場唔同講法，一定全力圍攻對手，讓球主勝同大盤值得兼投。

（有線63台周五凌晨4時05分直播）
Louis 推介

賓菲加大

3★

拿玻里 勝

3★

薩爾斯堡大

3★