希古恩主場交足貨拿玻里踢好「波」

猪拉多纳

今晚歐霸盃16強次回合，拿玻里主場迎戰波圖。雖然首回合拿玻里作客輸0:1，但佢哋今季主場踢盃賽特別醒神，至今7戰全勝，加上箭頭希古恩每逢喺自己地頭出戰歐洲賽必入波，齋計呢兩點就值得追捧1.9倍主勝。

（有線61及廣東體育周五凌晨4:05直播）
波圖後防殘陣應戰

計埋歐聯分組賽、意大利盃同上圈歐霸盃，拿玻里喺主場取得7戰全勝佳績，「小煙槍」希古恩更加例不虛發，當中4場歐洲賽場場有波入。至於首回合正選搏殺嘅軒歷基阿祖安奴、比圖斯、恩斯治尼同比哈美，上輪聯賽被主帥賓尼迪斯放喺後備，就算後備落場都踢得唔耐，留晒力喺今場搏殺。

對手波圖今場條防線信唔過，首席門將希頓日前喺「里斯本打吡」打柴，跟腱撕裂提早收咧。正選左閘阿歷士辛度要坐波監，被迫起用冇一隊經驗嘅迪亞高雷耶斯，中堅馬爾干彭利拿又拉傷肌肉，今場後防球員捉襟見肘，殘爆防線難頂主場威力強勁嘅拿玻里。
首回合︰拿客負0:1