維拉搏甩轆益晒史篤城

猪拉多纳

上場爆冷擊敗英超「一哥」車路士嘅阿士東維拉會再喺主場對史篤城，雖然維拉今場被睇好能夠主場取得三連勝，不過中游球隊踢好波只有一場貨仔，加上雙方對賽往績亦顯示維拉成日畀史篤城食住，所以科娜今場認為捧受讓嘅史篤城較為啱數﹗

（now 621周一凌晨零時直播）
打完車仔未回氣

維拉上場上下一心成功砌低車仔，表現冇得彈！但佢哋今場真係咁易乘勝追擊？首先，維拉自07年以來就冇試過喺主場取得三連勝，而且成班維拉球員上場搏到好盡，翼鋒艾邦拉荷整傷小腿，中場艾亞馬迪亦畀人踩傷脛骨，好彩兩人都冇大礙，今仗應該可以上陣，不過狀態點都爭少少。

睇番往績，呢啲中游球隊往往喺爆冷後沉番落嚟，維拉喺上年9月尾同曼城大演入球騷，最終以3比2擊敗曼城，但下一場同侯城打和0比0；所以話中游球隊始終爆發力不足，贏咗一場難再keep住個勢繼續贏。

史篤城賽前收到好消息，今季表現出色嘅借將艾薩迪今場傷愈復出，雖然進攻中場艾利蘭因加盟條件未能倒戈維拉，但有阿拿奧杜域補番佢個位，而且史篤城對賽往績食住維拉，維拉近8次喺英超對住史篤城僅勝一仗，睇到維拉對住踢法硬淨嘅史篤城冇晒符，讓球客勝值捧。