貝迪斯變落水狗馬體會乘勢追打

猪拉多纳

今晚Alwin踩過界推介西甲，目標場次係貝迪斯主場對馬德里體育會，馬體會近期成績回穩，歐聯殺入八強後，聯賽亦緊守次席，趁今晚皇馬同巴塞踢國家打吡，佢哋必然把握機會喺榜尾嘅貝迪斯身上攞晒三分，進一步挑戰聯賽盟主寶座。主隊貝迪斯啱啱喺歐霸盃搏到得番半條人命，根本回唔到氣，馬體會作客可以予取予求，客Ｗ甚至讓球客勝都捧得過。

（now 632周一凌晨零時直播）
貝軍極刑出局元氣大傷

Alwin喺周五凌晨追睇歐霸盃16強次回合貝迪斯主場對西維爾嘅賽事，貝迪斯首回合作客領先兩球，大好優勢下次回合都竟然搏到盡，不過西維爾無論質素同歐戰經驗都勝一籌，雖然全場貝迪斯表現同形勢都唔曳，結果西維爾仍然贏番兩粒，搞到要加時兼射12碼，貝迪斯喺互射12碼頭三輪都領先緊，最終兩輪射失招致飲恨，呢場波對佢哋嚟講係力疲心傷，絕對慘情。歐霸夢碎後，貝迪斯連回氣都嚟唔切，就要遇上實力超班嘅馬體會，呢班殘兵相信想再搏都有心無力了。

馬體會近期喺各項賽事3連勝重返正軌，歐聯大破AC米蘭士氣大振，佢哋目前以1分壓住巴塞隆拿，只落榜首皇馬3分，今晚適逢國家打吡，馬體會只要全取三分就可以坐收漁利，Alwin相信要贏冇質又冇力嘅貝迪斯只係簡單任務。