帕爾馬好波有好報

猪拉多纳

意甲近年水準下滑，但並非一無是處，阿King今季就好鍾意帕爾馬，球隊好多有「失意軍人」，包括教練鄧納東尼、射手卡斯辛奴、阿馬利等，但以蔗渣價錢，踢出燒鵝味道，製造出驚喜成績。踢好波有好報，卡斯辛奴仲有望重返意大利國家隊踢世界盃，令全隊士氣大振。帕爾馬主場對熱拿亞，主W十拿九穩，可用作過關重心。

（TVB 301周日晚7時30分直播）

帕爾馬今季圍繞卡斯辛奴作為進攻重心，配合阿馬利、馬高柏洛路及比亞比安尼等實而不華嘅球員，踢法簡單直接。卡斯辛奴屬天才型球員，只要唔搞事專心比賽，肯定有作為。

呢位昔日「壞孩子」修心養性，唔單止助帕爾馬創佳績，亦重新獲意大利領隊柏蘭迪利垂青，開腔話會考慮徵召佢踢世界盃，證明只要努力，一定有回報，尤其對於帕爾馬班「失意軍人」，更加有鼓舞作用。帕爾馬近10場聯賽8勝2和，踢出一線勁旅水準，熱拿亞勢難招架。
國米「細」火煲魚生粥

另外，國際米蘭繼續「煲魚生粥」，悶係悶啲，但最緊要贏波，主場對住近兩仗不失嘅阿特蘭大，估計又係冇乜交收，再追入球細。最後，薩斯索羅連續搶到分，護級重見曙光，作客烏甸尼斯，有得受讓，揀讓球客勝。