防線齊穿窿利華 賀芬咸「大」激鬥

猪拉多纳

德甲冠軍大局幾定，但係2、3、4位之爭就非常刺激，第4位嘅利華古遜同第8位嘅奧格斯堡都只係相差6分，利華古遜要殺入三甲亦唔係無可能，雖然佢哋近況差勁，好彩今晚對手賀芬咸嘅防守比佢哋更加差，兩支後防穿窿嘅球隊對撼，相信入波肯定唔會少，中位數去到3.5球都要買2.15倍「入球大」！

（有線61、201周一凌晨0:30直播）
利華射手爭士哥保飯碗

利華古遜近期表現曳，近5場聯賽1和4負未贏過，最大問題係後防場場都失波，踏入2014年之後只係試過1場聯賽零失球，而且佢哋最近傳出夏天買前鋒，名單包括紐倫堡前鋒祖斯比迪米斯同阿仙奴前鋒賓特拿等等，相信孫弘民、戴迪約克等射手都要爭氣啦！

講到前鋒，賀芬咸射手羅拔圖法明奴呢期最紅，呢位巴西球星喺球隊近8場比賽入面，有6場都入咗「士哥名單」，可惜賀芬咸條防線同樣咁得人驚，對上6場賽事勁失16球，既然雙方都係攻優於守嘅球隊，球迷今場坐定定等睇入球騷都得啦。
頂占筍盤： 利華古遜（入球大）