阿仙奴搵天鵝出氣

猪拉多纳

千場騷吞6蛋 雲格嬲到震

周中快車英超阿仙奴主場迎戰「天鵝」史雲斯，阿仙奴主帥雲格剛於領軍第1000場遭車路士重創，賽後嬲爆省到球員立立令，相信班「廠員」有羞恥之心，加上佢哋好少連衰兩鑊，誓必向沉到落水底嘅「天鵝」踩多兩腳氹番雲格，不妨直取讓球主勝。

（now 622周三凌晨3時45分直播）

雲格領軍第1,000場慘吞車仔6蛋嘅阿仙奴，眾將輸到頭耷耷，令原本值得慶祝嘅千場里程碑變成悲劇，其實雲格嘅排陣方面亦值得商榷，新星阿歷士張伯倫係就係潛力無限，但夾硬要佢踢防中明顯唔啱位，事關佢進攻意識太強，令到拍檔阿迪達防守壓力大增，遇上行軍快速嘅車仔，淨係輸反擊都輸死喇，輸鑊咁杰撻撻，相信雲格吸取教訓，會用番悍將法米尼打防中穩住防線。

雖然賽後「教授」雲格將輸波責任攬晒上身，但阿仙奴名宿溫特本爆料，話「教授」返入更衣室後嬲到發晒癲，仲即時省到班大帝狗血淋頭，相信「兵工廠」眾將會知恥近乎勇。睇番阿仙奴今季每次輸完畀強隊，通常下仗對住次一皮嘅對手都可以反彈，好少連衰兩鑊，好似之前於歐聯16強首回合吞拜仁兩蛋，幾日後即炒新特蘭四個一皮，今仗遇上史雲斯可謂嚟得合時。
史雲斯後防多甩漏

「天鵝」喺箭頭米捷長期受傷下，表現走晒樣，佢哋炒咗米高盧特立，委任毫無執教經驗嘅隊長蒙克頂檔，除首仗大勝宿敵卡迪夫城外，之後8場未贏過，就算前鋒韋菲特邦尼交足貨，可惜後防錯漏百出，前面入埋都唔夠輸，勢必成為阿仙奴洩憤獵物，讓球主勝不容錯過。