多蒙特 史浩克爭做老二 魯爾區打吡「大」混戰

猪拉多纳

德甲今晚開快車，焦點係拜仁砌低哈化柏林就可以封王，但講到矚目程度，肯定非多蒙特主場鬥史浩克04嘅「魯爾區打吡」莫屬！呢兩隊波為聯賽亞軍打拚，多蒙特暫時可集中火力應付聯賽，今晚撞正由亨特拉爾孭飛嘅史浩克04，雙方肯定搏錘，1.48倍入球大趁熱食。

（有線61及201、中央5台周三凌晨3:00直播）

多蒙特前排因為分心歐聯，搞到聯賽成績大跌Watt，上輪鬥漢諾威賽前，更有十幾位「蜜蜂躉」將成部警車推冧，搞到會方隨時受罰。不過多蒙特自從篤定殺入歐聯8強之後，聯賽戰績亦都上番正軌，上場對漢諾威後備入替有波入嘅馬高列奧斯，今晚亦會重返正選行列，有佢幫奧巴美揚同羅拔利雲度夫斯基校炮，火力唔講得笑。但多蒙特自從蘇保迪、根度簡等主力受傷後防線唔係太穩陣，睇怕今仗都係以攻代守。

史浩克呢排大把壞消息，歐聯16強連輸兩場大大劑畀皇馬踢出局，加上近期克里米亞「入俄」引起軒然大波，史浩克每季都收緊俄羅斯天然氣1,700萬歐元（約1.8億港元）贊助費，家陣俄羅斯被美國同歐洲國家喪鬧，有政客就叫史浩克盡快搵過新贊助，同俄羅斯天然氣及普京斬纜。
史浩克拒同普京斬纜

不過史浩克老闆東尼斯一於少理，尋晚向《圖片報》話唔認為有問題，會繼續合作。講到尾史浩克都係想搵水，咁來季殺入歐聯就最直接啦！由亨特拉爾夥拍法芬組成嘅箭頭夠晒猛火，但球隊防線一樣不穩，今次惟有靠亨特拉爾入多幾球填番條數啦！
頂占筍盤：多蒙特（入球大）