球隊艱難時更要支持

猪拉多纳

今輪英超阿仙奴主場又對曼城，我好似已經預計到呢場比賽嘅賽果，就喺阿仙奴再輸一場，甚至乎再次大敗。老實講「兵工廠」近況真係唔掂，畀車路士大勝之後，對住史雲斯都只係令人失望咁和波，連雲格都承認爭標冇計，爭前四實際啲。

講開對車路士場波，上星期我好開心得到阿仙奴球迷嘅邀請同佢哋一齊睇直播，結果開波7分鐘就已經分出勝負。我哋當然好失望啦，但覺得唔關雲格事，因為成隊傷兵太多，正所謂巧婦難為無米炊，怪就怪個天都唔保佑阿仙奴。

嗰場波雖然阿仙奴上半場已經輸得好慘，不過現場球迷都冇離場，反而喺半場時互相鼓勵，睇波支持球隊唔係只在佢成功時，而係在於球隊艱難時，嗰晚阿仙奴球迷做到。
主場對曼城繼續撐「廠」

雖然以近況分析，阿仙奴無論人腳、氣勢同狀態每樣野都輸畀曼城，但咁又點，唔通怕輸就唔支持咩？做人亦一樣，唔可以因為驚畀人話或者笑而放棄自己想做嘅嘢，我唔會囉，因為我嘅人生就只係向自己交代。真正球迷支持球隊亦唔會怕球隊成績下滑，怕被人抽水而唔支持，所以今個星期六晚，我一定會睇對曼城呢場大戰，當然亦會支持兵工廠。

（now 621周日凌晨1時30分直播）