勝利 悉尼鬥攻做大騷

猪拉多纳

澳職常規賽已經鬥到入最後直路，前6形勢爭持激烈，今日墨爾本勝利主場迎戰FC悉尼，主隊依家排第3，梗希望再上一層攞到個第2，咁去到季後賽就可以踢少一場，以逸待勞兼夾到時又有主場之利嘞！而排第7嘅FC悉尼就更加要趕搭季後賽尾班車，最後呢3場波絕對不容有失。由於雙方爭勝決心都好大，預期會放開懷抱鬥攻，1.55倍入球大有保證。

（有線64及203周六下午4:45直播）

勝利近排要分心踢「亞冠盃」，教練梅斯卡特經常畀主力球員輪流休息，踢法亦變得較為賭博性，進攻意欲明顯比上半季強咗好多。佢哋近10場有7戰攻入兩球或以上，但失波亦唔少，有4場係失兩球或以上。依家仲有左閘阿達馬查奧爾受膝傷困擾多數唔踢得，中場布洛斯咸又累積滿8張黃牌要停賽，今場仲唔係有前冇後？
爭踢季後賽場場搏命

作客嘅FC悉尼依家形勢危急，佢哋同第6位嘅紐卡素噴射機同分，教練法連拿賽前已經告誡班兵唔畀再失分，咁即係話連作客都唔會死守啦！何況兩個月前作客墨爾本勝利，FC悉尼都曾經大勝過5:0，班球員自然更有信心去搏去攻，今場入球肯定唔會少囉！
頂占筍盤：墨爾本勝利（入球大）