拿玻里剃祖記眼眉

猪拉多纳

山寨王擺鴻門宴

意甲褐色大戰，拿玻里主場對挑戰一哥祖雲達斯，祖記喺聯賽一枝獨秀，爭標可謂大局已定，依家只係等捧盃，球員上陣難免少咗份激情，更何況首席射手泰維斯停賽，攻力肯定打折扣，以祖記近期頻「煲魚生粥」走勢，勝算唔高。拿玻里即使追趕無望，但身為南部「山寨王」，自己地頭出擊，為向fans交代，點都要剃一剃祖記眉，攞番個尾彩，平手盤揀拿玻里。

（TVB 301周一凌晨2時45分直播）

祖雲達斯勝仗連連，但好多場都係僅僅熟，贏得好忟水，近5場勝仗全部淨贏1球，上仗鬥帕爾馬，如非對方射手阿馬利被逐，能否全取3分都成疑問。
祖記冠軍在望唔慌搏

其實祖記可以連番奏捷，好大程度上由於意甲缺乏具級數挑戰者，拿玻里算係少數可以同佢哋鍊一鍊嘅球隊。祖記缺少咗近兩仗入3球嘅泰維斯，想贏埋今場絕對唔易，再者祖雲達斯拋離次席羅馬14分之多，就算今場輸波亦冇乜大不了，不如留力周中歐霸盃鬥里昂好過，今場隨時Hea踢。

意大利南北部地區喺政治及經濟上向來存在矛盾，身為南部最具代表性球隊嘅拿玻里，遇上北方霸主祖記，絕對唔衰得，今場一定搏盡，為面子而戰。拿玻里整體人腳唔比祖記差，希古恩、荷西卡利祖、咸錫都係獨當一面進攻好手，加上戰意勝一籌，有力擊敗祖雲達斯。