想放假？715之後啦！

猪拉多纳

香港球迷其實真係好幸福，一個咁細嘅城市喺嚟緊嘅4月開始竟然可以透過螢光幕睇到五花八門嘅足球比賽，包羅萬有嘅程度簡直令人抖唔到氣。

當中除咗爭持激烈嘅英超同西甲外，仲有意甲、法甲同德甲。其後嘅歐聯同歐霸盃8強戰，當中歐聯嘅戲碼可以話係史無前例咁勁，歐霸盃就以祖雲達斯及賓菲加比較標青。
3個半月豐盛「球宴」

踏入5月除咗聯賽，仲有英格蘭足總盃、西班牙盃同意大利盃嘅連場好戲，去到5月24日就會上演萬眾矚目嘅歐聯決賽。當歐聯決賽過後，大家以為可以抖吓嘅時候，巴西世界盃將喺6月殺埋身，Peter認為淨係做預測都會搞到「頭爆」，所以專登整個簡介，等球迷留意住有幾多豐富嘅賽事。

Peter曾經諗過喺世界盃舉行前放番個零禮拜假，養精蓄銳去迎接呢項四年一度嘅盛事。

不過，呢個好明顯係理想，唔能夠實行，因為Peter依家除咗要講意甲同法甲外，仲要做埋世界盃前瞻節目，若然要放假真係要等到7月15日世界盃完結後先可以實現。

嚟緊3個半月可以話係史無前例、非常豐盛嘅足球滿漢全席，Peter自上世紀50年代開始睇波直到今日，都係第一次面對咁豐富嘅足球賽事，作為球迷自然會感到目不暇給同喜出望外。

至於Peter能夠親身參與現場評述，可以話係非常幸運，實在夫復何求！
金句：停不了的春夏季足球滿漢全席