新特蘭扑錘救命

猪拉多纳

護級對手今輪猛搶分

英超護級球隊今輪齊齊發威，榜尾五弱四隊有分落袋，跌至尾二嘅新特蘭壓軸登場喺主場迎戰韋斯咸，「黑貓」面對有本錢踢風流波嘅韋斯咸不容再失，趁「錘仔幫」主帥艾拿戴斯激嬲球迷冇人撐，有望贏番場紓緩壓力，讓平半合理，上盤有1.89倍博得過！

（now 621周二凌晨3時直播）

新特蘭今季於本土盃賽都打得好，偏偏聯賽唔爭氣，家陣位列尾二落後尾四嘅西布朗四分，但打少兩場，數字上仲有優勢，但大前提係佢哋要贏晒兩場波先可以反先，講就易喇，「黑貓」近五場聯賽加埋攞得一分，加上幾支競爭對手今輪齊齊大打爭氣波，「黑貓」再唔爭氣搶分真係唔掂。

新特蘭上輪作客利物浦改踢五三二陣式僅敗，呢個新陣令球隊中場逼搶力大增，兩隻翼衞巴士利同馬高斯阿朗素走上走落攻守兼備，消息指教頭普耶今場會沿用相同陣式。中鋒史提芬費查現時仍要養傷，利物浦借將波連尼上仗冇得倒戈，今戰可復出攻堅，人腳真係唔曳。
韋斯咸風流波唔使搏

韋斯咸上周主場砌低侯城，目前領先尾三卡迪夫城八分，暫時尚算安全。不過「錘仔幫」教頭艾拿戴斯不得民心，上仗贏波都被球迷噓爆，佢話自己同粉絲關係冇問題喎，但全世界都睇到佢冇人撐啦！大軍仍有箭頭波里路及守將占士哥連斯養傷，後者缺陣令防線中路現弱點，結合近兩次作客新特蘭全敗劣績，今次難望搶分。