拜仁—1降魔冇難度

猪拉多纳

各走極端講乜贏乜

歐聯8強首回合矚目大戰，英超曼聯主場迎戰德甲拜仁慕尼黑。兩支過往叱咤歐聯嘅勁旅今日碰頭，卻成為強弱懸殊戲碼，無論比較球員質素、教練級數、戰術、狀態、信心、賽前備戰同陣容完整性，曼聯都遠遠落後於拜仁，今場係一面倒賽事，作客嘅拜仁絕對唔會輕視對手，去到奧脫福要贏「莫耶輸」嘅曼聯兩球唔係難事，推介2.27倍讓球客勝。

（有線61、64、201及203台周三凌晨2時45分直播）

曼聯同拜仁走勢各走極端，雙方正不斷打破球會史上最差同最佳紀錄，曼聯喺莫耶斯接任後表現同成績都急速下滑，呢位教頭戰術單調落後，思想作風保守，欠缺膽識亦全無創意，臨場應變能力差，亦無力提升球員士氣，根本唔係教大球會嘅材料。曼聯今季遇強即屈，尤其三月份主場先後被利物浦同曼城大炒，連過去紅魔唔夠打都同你死過嘅鬥志都冇埋，任人魚肉。曼聯能夠打入歐聯八強，全靠抽到絕世好籤，嚟到呢一刻運氣相信已經用完咯！
朗尼獨力支撐殘陣曼聯

曼聯今季好依賴陣中幾位具質素嘅球員改變戰局，今季踢得好嘅幾場賽事，星級球員尹佩斯、朗尼、桑馬達及香川真司分別都有亮麗演出，不過呢批球員今晚相信只得番朗尼一個打正選，好難單天保至尊。事實上，曼聯今晚陣容極殘，尹佩斯、拉菲爾達施華同路爾斯華倫西亞因傷缺陣，艾拉停賽，桑馬達因為代表過車路士踢歐聯而唔符合上陣資格，連里奧費迪南、莊尼伊雲斯、基斯史摩寧同拿尼亦剛傷愈上陣成疑。至於香川真司雖然得到莫耶斯口頭讚賞，但莫帥今季遇強隊基本上都唔會畀佢打正選，今晚情況相信都唔會改變。

曼聯另一不利因素係今季開局太差，嚟到呢一刻，對於莫耶斯嚟講每場波都係生死戰，所以上周末聯賽主場對弱旅維拉都唔敢留力，相反對手拜仁喺德甲破紀錄提早封王後，一早將目標指向今仗，上周末聯賽對賀芬咸輪換七名主力，球員落場亦吓吓就住，最終雖然和波終止連勝紀錄，但就成功達到留力今仗嘅效果。
拜仁今屆客戰英倫全勝

拜仁喺新帥哥迪奧拿手上已完成融合工程，而且進入另一境界，球隊強調絕對控制，除咗互相走位傳球出神入化外，球隊喺失去控球權時，立即全隊圍逼搶截對手，只要佢哋認真作戰，對手根本難望偷雞。拜仁今仗雖有中堅丹迪停賽，中場堤亞高艾簡達拿受傷，但兵源充裕，陣容影響極微。自上屆起，拜仁喺歐聯淘汰賽階段嘅兩回合賽事，首回合唔理主客都照攻照贏，今季兩次作客英倫先後贏曼城3比1同阿仙奴2比0，曼聯現時戰鬥力喺呢兩隊之下，根本冇條件發圍！