遇強即屈！曼聯任「仁」劏

猪拉多纳

歐聯宿敵 8強對決

歐聯8強，宿敵對碰！除咗巴塞同馬體會呢對西甲冤家，今晚另一場8強戰，都有曼聯主場迎戰拜仁呢個99年決賽翻版戲碼！不過曼聯已今非昔比，相反提早7輪捧走德甲冠軍嘅拜仁正值巔峰，兩軍簡直係天同地比，拜仁要喺奧脫福大開殺戒？唔難囉！強捧2.27倍「讓客」！

（有線61、64、201及203、中央5台周三凌晨2:45直播）

曼聯領隊莫耶斯廢到冇朋友，不斷挑戰魔躉底線，「廢莫」唯一出路，就係殺入歐聯4強，否則執定包袱都得咯。可惜，睇番紅魔今季嘅歐聯之路，分組賽最勁嘅對手只係利華古遜，16強抽到對奧林比亞高斯已經係上上籤o架啦，但都要搞到絕地反擊先可以驚險晉級囉！
紅魔三線都有主將缺陣

人唔會一世行運嘅，莫耶斯啲運已經用得七七八八，加上佢哋同拜仁嘅實力差幾班，王牌前鋒尹佩斯又要養傷，中場桑馬達唔出得，防線則有左閘艾拉停賽，點踢呀？

最大鑊係曼聯今季對勁旅例衰，英超被曼城同利物浦「雙殺」不特止，睇埋佢哋今季英超13次對住聯賽前9隊伍，竟然只係贏過一次，即係話稍為有啲實力嘅，都可以玩殘曼聯！阿占冇嘢望呀，淨係望紅魔如果又喺主場慘敗，班「魔躉」可以冷靜啲，唔好好似之前咁，走去打莫耶斯洩憤呀！
拜仁捧咗德甲專心搏歐聯

拜仁提早完成衞冕德甲大業後，可以將所有心機擺晒落歐聯度。事實上，佢哋個陣容又真係強到令人難以置信嘅！列貝利、洛賓同馬里奧葛斯嘅進攻組合無疑係世界級，大家又試吓將拿姆同舒韋恩史迪加呢對中場拍檔，同曼聯嘅卡域克同費蘭尼比較吓，你就會Feel到拜仁要大勝，根本係易過借火！
頂占筍盤：拜仁（讓球客勝）

拜仁作客醒神

拜仁慕尼黑近9場作客全勝。

朗尼今屆歐聯已經交出7次助攻。

拜仁喺分組賽敗予曼城前，曾創出歐聯10連勝嘅史上最佳紀錄。
有線球彩台主持阿占

電郵：soccer64@cabletv.com.hk

面書球彩專頁：http://fb.com/icable64

PHONE波熱線：1831 678

「智勝館」開放時間：

周二晚10:30至晚11:30