首爾返地頭折「箭」報仇

猪拉多纳

亞冠盃分組賽今日戰火重燃，其中以F組形勢最為激烈，以5分排榜首嘅FC北京只係同榜尾中岸水手相差2分，至於廣島三箭上仗主場以2:1打敗FC首爾後，與後者同得4分，只憑得失球較佳排次席。今仗FC首爾回師主場迎擊廣島三箭，肯定想報番上場輸波之仇，1.75倍主勝唔好錯過。

（now671台周二晚6:30直播）
三箭射手狀態曳

唔睇好廣島三箭可以喺今場搶到分，皆因球隊王牌射手佐藤壽人今季狀態低沉。計晒開季至今所有賽事，呢位前鋒只得2球進帳，其中1球更係靠12碼建功，腳風認真唔順。至於另一前鋒石原直樹質素唔算高，至今只得1球「士哥」，隊波鋒力弱，主場都可能有啲勝望，作客就真係幾難捧得落手。

FC首爾新加盟前鋒拉菲爾哥斯達，雖然喺之前3場分組賽都只係後備上陣，不過落場時間明顯增加，上仗作客三箭更一度幫球隊扳平，今仗或有望擔正。睇番首爾對上3次出戰亞冠盃都未試過喺分組賽出局，相信佢哋今仗會力爭3分，以便 攞番出線主動權。
亞冠盃F組