比翼雙飛直路正斗

不死鸟

買英愛自購馬，大摩認第二冇人敢認第一，胡森亦係英國通，今日兩馬房都有新貨到，特別介紹大摩的「比翼雙飛」，匹馬響英國跑四場得兩勝一位，兩場二級賽成績一亞一第五，來港評92分居然拍得住二級賽頭馬「步步快」，反映出評磅員幾咁重視，查番「比翼雙飛」於二級賽不敵高多芬馬房?SHAWEEL，當時兩歲第一次跑1200米，雖敗猶榮也，要知道SHAWEEL再出一場響愛爾蘭國家錦標一級賽，只係叮噹馬頭輸少許。
再睇「比翼雙飛」來港後試三個大閘，白德民刻意留實掩藏本身速度，同主「鳥語花香」一出即勝前試閘又係有相同手勢，今次初出跑外地贏開的1000米直路賽，肯下決心的話，同組對手都要俯首稱臣。
胡森的「彩旗飄飄」級數同「比翼雙飛」差一大截，本身響英國跑過八場，後期要響纖維沙才搵到出路，大勝10個馬位又如何，該場是最低組別之兩歲馬賽，水準真的連本港四班水平也不到，編插三班相信要坐一輪馬監。