遊俠兒出辣招

猪拉多纳

　　今晚8場谷草A跑道賽事，本來好地地，因為呢條賽道比較公平，依家場地受了連場大雨係咁灑呀灑，塊地唔慌會好得去邊，爆冷可能因此而起。講到尾，明知山有虎，梗係買細啲為妙。

　　第一場五班1000米。呢期肥仔胡時不時有攻勢，「高山威龍」近績穩定，點會唔好好利用。上次雖然都係輸畀「辣得喜」，一來，終點前先至畀人過頭，再遇未必冇得鬥；二來，排1檔，地淋放順可能就此帶到。

　　第五場四班1650米。方仔對「準備就緒」初出1200米run場先，次仗即上1400米，至上場進軍1600米，無間斷咁增程，嚟到呢場跑一哩，應最合馬性。另一方面，由田草轉戰谷草，邊搵到「電訊太子」同「招財快駒」咁勁嘅對手，應到出頭之日矣。

　　第七場三班1200米。「遊俠兒」前仗末段撲上殺低「寶貝王」，留下好深刻印象。上場再出追勢冇咁勁，輸到唔知乜頭乜路。呢次阿輝對隻馬唔同嘞，操到辣一辣，整課大閘磨練吓狀態，手法夠認真。又難得潘頓上次跑輸咗，冇嫌棄匹馬，肯繼續效力，冇可能輸完一場又一場啩？！而此駒隔晚有晒飛墊底，更加可靠。(陳華棟 資深評馬人)