「醜陋足球」大師信得過

猪拉多纳

歐聯打到8強，每隊都會步步為營，小心為上，否則因一次犯錯而飲恨，咁就喊都無謂，防守至上往往係踢淘汰賽第一法則。呢個階段嘅比賽多數緊張而唔精彩，尤其係巴黎聖日耳門主場對車路士，車仔領隊莫連奴出名講究穩陣，戰術機關算盡，唔會亂攻，細鬼認為佢哋會以守為主，所以今場入波唔慌多，首選入球細。另一場，皇馬高過多蒙特一班波，起碼贏到兩粒，直取讓球主勝。
聖日耳門唔標青

車路士無論由莫連奴、格蘭，抑或迪馬堤奧執教，逢親踢歐聯，都係穩字行先，遇到強敵甚至不惜放下身段，干脆屯重兵後防死守。睇佢哋前屆點樣以穩守突擊搞掂巴塞隆拿同拜仁慕尼黑，就知呢套戰術的確可行。莫連奴更加係「醜陋足球」大師，今季請佢回巢領軍，預咗車仔會採取悶蛋踢法爭標。聖日耳門喺法甲也文也武，但去到歐聯唔算特別標青，要破車仔拉布踢法，並唔容易。

至於上屆4強翻版戰，皇馬對多蒙特，相隔一年，形勢已180度大逆轉。皇馬由安察洛堤執教後，球隊夠晒團結，水準亦穩定好多，最重要係C朗繼續大勇，簡直係所有後衞嘅噩夢。多蒙特明顯跌Watt，狀態、人腳實力都唔及上屆，可以打入8強，好大程度因為上圈抽中對弱隊辛尼特嘅啫，今次再遇皇馬，多蒙特無力重溫舊夢。