歐聯8強最緊要咪「失身」

猪拉多纳

今晚歐聯兩場賽事，巴黎聖日耳門（PSG）對車路士以及皇家馬德里對多蒙特，戲碼可以話係勢均力敵。其中PSG對車路士嘅賽事，PSG主帥白蘭斯喺賽前猛笠車路士主帥莫連奴高帽，指莫帥係大師級。車路士上周聯賽雖然不敵水晶宮，但白蘭斯指並非車路士出現問題，只係水晶宮門將及後衞表現出超水準，先至出現呢個爆冷賽果，並非球員心不在焉。所以，白蘭斯話PSG今晚一定會將呢場波當決賽咁踢，唔會有半點鬆懈。事實上，Peter覺得PSG同車路士都唔係剩係想贏波過關咁簡單，兩隊其實都想染指今屆歐聯冠軍。今場雙方實力平均，車路士着數在「先客後主」，心理上會有少少佔優。
第二回合至盡地一煲

至於皇馬主場對多蒙特一仗，皇馬兩星期前仲係叫緊胡歐聯同西甲雙料冠軍，點知依家已經變咗另一回事，真係估死我哋啲球評家。至於呢場賽事，Peter覺得雙方都會踢保守足球以和為貴，最緊要就係唔好「失身」，即係要保住清白之身，留番第二回合先盡地一煲去砌過。Peter認為歐聯8強階段打到埋身，場場波都勢均力敵，最重要嘅就係唔好「失身」，有時踢一場不分高低同冇交收嘅賽事，都唔係一件壞事。
金句：猛笠高帽Vs示人以弱