恒大贏即出線再拆「車」

猪拉多纳

亞冠盃今日繼續激戰連場，衞冕嘅廣州恒大（足智彩譯：FC廣州）將會喺G組造訪全北汽車。雙方首循環交手，恒大已經贏過佢哋一鑊勁，相信以迪亞文迪領銜嘅鋒線會再一次恰死全北，恒大作客小讓平半，梗係捧1.95倍上盤啦！

（now671台周三晚6:00直播）

由於恒大班機Delay，大軍尋日下晝先抵達全州，教練納比以舟車勞頓為由冇出席記招，結果畀當地傳媒鬧冇禮貌。查實韓媒咁火又難怪嘅，畢竟全北兩個禮拜前先以1:3輸畀恒大，當地媒體《可汗體育》就以「復仇」嚟包裝呢場波，睇落全北好有鬥心喎！
全北缺主將李承琪

之不過咁，全北今季喺韓職表現真係好一般，5戰3勝1和1負僅入6球，加埋中場主將李承琪因傷缺陣，想搵恒大報仇邊有咁易吖！目前喺G組排頭嘅恒大，今仗贏波就有機會提前兩輪鎖定出線資格，會方賽前例牌又出海報助威，今次就以「鋒芒所向」做主題，再用支紅箭隊住全北個主場，夠晒侵略性。賽前有消息指狀態低迷嘅穆里奇經納比心理輔導之後，今仗亦會落場搏殺，全北點頂得住恒大嘅攻勢呀？

猪拉多纳