里昂受讓下盤值捧

猪拉多纳

祖記傷停嚴重鬥心成疑

歐霸盃8強首回合里昂主場戰祖雲達斯，捧盃大熱祖記表面風光，但其實暗藏危機。呢支意甲豪門剛被打破連續22場聯賽不敗走勢，難免洩氣，今仗更受傷停問題困擾，包括中場大將維達爾停賽，意國球隊傳統上忽視歐霸盃，爭勝意欲成疑。多個不利因素影響下，祖記作客讓半一信唔過，揀里昂下盤。

（有線61台周五凌晨3時05分直播）
聯賽破金身損士氣

祖雲達斯喺意甲一枝獨秀，奪冠在望，但同時亦由於長期欠缺挑戰，令球員作戰心態逐漸鬆懈。近期往往小勝了事等收工，即使贏波亦欠說服力，上仗遇上較具實力嘅拿玻里，即刻露餡吞兩蛋，22場聯賽不敗走勢終於斷纜，反映祖記長期安逸，失去一份爭勝嘅飢渴感，一時三刻好難谷得番起。尤其係意甲球隊一向唔太重視歐霸盃，更難期望祖記今仗會有脫胎換骨改變，好可能留待次回合返主場再搏殺。

祖記另一個問題係人腳不整，今季為球隊攻入11個聯賽及5個歐洲賽入球嘅維達爾停賽，火力即刻打折扣。兩位中堅巴沙利及奧邦拿又齊齊因傷倦勤，加上左閘比路素亦養傷，防線人腳緊絀，連祖記主帥干地都話：「我哋近期連場征戰，大部分球員都好攰同埋有傷在身，佢哋完全得唔到休息機會，我開始感覺到有啲唔妥。」咁講法，即係話里昂隨時有可乘之機。
進攻鐵三角腳風順

無可否認里昂實力已今非昔比，不過爛船始終有三斤釘，當中近23次主場僅錄兩敗，而歐霸盃主場更係未輸過，祖記想喺佢哋地頭贏波相當困難。尤其里昂嘅進攻鐵三角拜恩特、拿卡錫迪、巴菲迪比高美斯腳風都好順，有力撕開祖記殘缺防線，受讓之下非常着數，下盤好路。