葡超雙雄惡氣爆燈！波圖搶主W誓斬西維爾

猪拉多纳

歐霸8強首回合爆發伊比利亞半島大戰，葡超班霸波圖主場迎戰西甲西維爾。波圖近期喺聯賽不斷失分，衞冕機會渺茫，惟有集中火力喺盃賽發圍，撞啱西維爾今仗傷停嚴重，波圖必趁機先拔頭籌，主勝有買趁早。

（有線62台周五凌晨3時05分直播）
聯賽冇希望專注爭盃

上季乘住賓菲加自毀長城，後上捧走聯賽錦標嘅波圖，啲好運睇嚟用盡晒，經過上仗不敵國民隊後，佢哋已經畀榜首嘅賓菲加同士砵亭拋離15分同8分，衞冕只餘數字上嘅可能，惟有改變策略轉攻盃賽。波圖先喺葡盃4強首回合1比0領先賓菲加，上圈歐霸又淘汰意甲前列勁旅拿玻里，過氣名將哥利斯馬更鹹魚翻生有入波，拍住哥倫比亞箭頭積臣馬天尼斯殺傷力極大。

對手西維爾今仗唔單止有法斯奧及麥比亞坐波監，仲有丹尼爾卡列高、基斯度科路及卓利舒夫因傷倦勤，呢班全部係中後場悍將，佢哋唔在陣無疑令西維爾防線中路大開，隨時讓決心爭標嘅波圖有機可乘，主勝有1.7倍咪嫌少。