波圖搶攻「病壞」西維爾

猪拉多纳

葡超波圖今晚喺歐霸盃8強首回合，主場迎戰飽受傷停困擾嘅西甲西維爾。波圖新帥卡斯度上任後全力衝擊歐霸盃，今晚仲唔趁對手病攞佢命咩？撐1.7倍主勝。

（有線62及202周五凌晨3:05直播）
新帥卡斯度想捧盃交差

波圖今季聯賽表現跌watt，上個月初怒炒教練方錫加，搵嚟新帥卡斯度接手。坦白講，佢哋喺葡超已經落後榜首賓菲加15分，想爭聯賽錦標只係癡人說夢。卡斯度都算知機，上輪領軍淘汰熱門球隊拿玻里，就知佢哋專心爭歐霸盃，志在捧呢個盃返去交差。雖然門將希頓養傷，但中堅文加拉有望趕及復出鎮守後防，加上前線由積臣馬天尼斯同哥利斯馬攻堅，依然值得秤先。

西維爾上場作客輸畀切爾達0:1，4連勝告終，更大鑊係今仗中後場需要大執位，中場麥比亞、基斯度科路、中堅法斯奧同埋丹尼爾卡列高等人分別受傷停影響，夾埋至少5件唔打得，對板櫈深度唔夠嘅西維爾嚟講梗係惡搞喇，今晚好難頂得住來勢洶洶嘅波圖囉！