車仔顧住歐聯細破史篤城

猪拉多纳

剛喺歐聯鎩羽而歸嘅車路士今晚喺英超尾場迎戰史篤城，車路士近期作客屢受挫折，如果今次喺史丹福橋都攞唔晒三分，爭標相信可以提早扯白旗，不過主W只得1.18倍冇肉食，由於今季喺主場腳風特別順嘅伊奧度繼續養傷，唔使旨意靠費蘭度托利斯及丹巴巴亞可以大炒對手，棄1.7倍讓球主勝，改取較好分頭嘅2倍入球細。

（now 621周日凌晨零時30分直播）

車路士近期作客成績差到爆，連盃賽在內除咗三連敗之外，對上七場只贏過英超包尾大幡富咸，面對西布朗、阿士東維拉及水晶宮只攞到一分，如果唔係擁有主場不敗戰績，相信一早已被踢出爭標行列。自從史篤城喺08/09球季重返英超以來，連盃賽過去七次作客史丹福橋全部輸晒，當中六次食蛋，以車路士目前嘅主場氣勢及搶分急切性，全取三分應該冇問題。
伊度奧養傷 入波更難

車仔今仗有巴西中場拉美利斯停賽，但喺歐聯唔符合上陣資格嘅尼曼查馬迪可復任正選，整體影響不大。反而要擔心車仔嚟緊周三凌晨就要喺歐聯再戰巴黎聖日耳門，有後顧隨時唔去盡。領隊莫連奴上次輸波後公開批評費蘭度托利斯，擺明唔會再對佢有任何期望，今季喺主場入晒個人八個聯賽入球嘅伊度奧又未好番，無論用丹巴巴亞或者舒賀爾尼，攻力都畀唔到車迷信心。

睇番史篤城對上七次作客史丹福橋輸波，但只有一次被大炒，如果以中位數2.5球計，一共開出五次入球細，包括最近三次輸0比1，而且史篤城今季作客另外兩支爭標勁旅曼城及利物浦又係輸0比1，今場除咗捧細盤，主隊勝「1:0」波膽亦值得小敲。