皇馬作客做大「蘇」

猪拉多纳

C朗養傷一樣夠殺

今晚西甲皇家蘇斯達將會主場迎戰「銀河艦隊」皇家馬德里。皇蘇近期表現反覆，勁嗰陣可以擊敗巴塞，衰嗰陣輸埋畀尾3嘅艾美利亞都仲得。今季佢哋面對聯賽三雄踢法進取，唔會死守，中場基沙文大熟大勇，當然有攻破皇馬嘅本錢，但係後防嘅甩漏都唔少o架，咁嘅格局，就算入球中位數開到3.5，相信都開得出2.25倍嘅「大」呀！

（now632台周日凌晨2:00直播）

皇蘇今季主場威力強勁，獲15戰10勝3和2負嘅佳績，代表作當然係3:1擊敗巴塞隆拿啦！球隊鋒力強勁，由前鋒卡路士韋拿、阿基列斯同中場基沙文組成嘅前線三叉戟應記一功，3個加埋交出34個聯賽入球，絕對有力喺今晚入波。不過，佢哋嘅後防喺聯賽對住皇馬、巴塞同馬體會表現不濟，5場合共失咗16粒，今晚似乎都要失番幾粒。

皇馬早前聯賽兩連敗，現時喺聯賽榜落後一哥馬體會3分排第3，爭標形勢變得被動，除咗寄望競爭對手失分，唯一可以做嘅就係喺餘下7場全部贏晒，所以戰意毋庸置疑。
謝斯仔手術後感染

雖然皇馬賽前傳出壞消息，周中歐聯因傷提早退下火線嘅C朗，被教練安察洛堤親口確認唔會上陣，至於本身抖緊嘅小將謝斯洛迪古斯，更因為膝部進行手術後出現感染，要再次去德國入院檢查。不過安帥話上仗有「士哥」嘅加里夫巴利狀態非常弗，仲話出艾華路莫拉達已經足夠頂替C朗，今仗要入番幾粒，冇難度啦！