華倫西恩斯護級搵里救

猪拉多纳

今晚法甲直播賽事由華倫西恩斯主場鬥里昂，里昂繼上周於打吡戰不敵聖伊天後，上周中再於歐霸盃8強首回合又輸畀祖雲達斯，對上五場比賽錄得一勝四負劣績，依家佢哋落後第三嘅里爾九分，要爭逐下屆歐聯參賽資格可以話冇乜機會，倒不如留力搏吓盃賽好過。
里昂專注爭盃輕視聯賽

事實上里昂周中除咗要應付歐霸盃8強次回合，月中亦會同豪門巴黎聖日耳門角逐今屆法聯盃錦標，相信佢哋都會集中火力備戰呢兩場波，睇下有冇雞偷好過，現階段聯賽成績對佢哋嚟講反而唔會太着緊。

未踢今輪比賽前，華倫西恩斯落後尾三嘅伊維恩五分，護級仲未絕望，佢哋上次主場意外不敵包尾球隊阿些斯奧，全因比賽末段過於輕敵，吸取教訓會打醒十二分精神，喺輸畀阿些斯奧前，球隊主場已保持六場不敗，平手盤值支持。
TVB 301周日晚11時直播