拖肥鋒頭勁廠仔冇得剩

猪拉多纳

今晚英超爆發前4大激鬥，由愛華頓主場硬撼阿仙奴。已經連續7年未砌低過「兵工廠」嘅「拖肥糖」，計往績就輸晒o架嘞，不過愛華頓今時唔同往日，由馬天尼斯領軍下「升晒呢」，攻擊孖寶盧卡古同巴克里近期仲猛咁入波添，「鋒」頭咁勁對住成個月只贏過1場聯賽嘅阿仙奴，主場出擊平手盤梗係要撐。

（now621台周日晚8:30直播）
盧卡古 巴克里勁入波

今季英超錦標爭持激烈，「4哥」席位一樣爭崩頭，愛華頓暫時落後排第4嘅阿仙奴4分但踢少場，要後來居上爭取來屆歐聯入場券仲有機會。「拖肥糖」今季改由馬天尼斯領軍後，表現仲好過莫耶斯時代，占士麥卡菲夥拍巴利嘅中場第一度屏障夠晒穩陣，但講到最出位，始終係巴克里同盧卡古呢對攻擊孖寶。

呢兩位仁兄今季夾埋已經有17個聯賽士哥，當中近6仗仲夾手夾腳省入6粒，加埋右翼衞史密斯高文迄今亦有7球進帳，前中後三線都布滿炮台，要打破連續14次鬥阿仙奴不勝嘅悶局，相信今仗係時候。
藍斯復出未必幫到手

話就話阿仙奴近7年都未輸過畀愛華頓，但查實雙方近3次喺英超交手都係和氣收場，證明「兵工廠」已經再食唔住呢粒「糖」。冇錯，阿仙奴今仗係有艾朗藍斯傷愈候命，但呢位中場養傷超過3個月，狀態好極有限，今仗極其量只會先任後備，相信唔會咁快幫到隊波手。

「兵工廠」上仗逼和曼城1:1後，無疑為陣營帶嚟極大鼓舞，但咪忘記佢哋近5場英超作客只贏過1場咁大把，對住車路士同利物浦夾埋失咗11粒，就連造訪史篤城都要輸，試問去到葛迪遜公園點會有運行吖！
Data King：廠仔英超個幾月贏得1場

‧愛華頓對上14次鬥阿仙奴未贏過。

‧阿仙奴自3月至今英超只贏過1場波。

‧過去兩季普多斯基係英超轉化入球率最高球員（以入10球或以上計），有33%。
乜都玩錦囊：拖肥下半場嚟料捧「半和」

愛華頓近況好唔使多講，但佢哋慣咗下半場先嚟料，就講最近9場波，「拖肥糖」足足有8仗開半場和，加埋對上6次同阿仙奴交手亦有5次半場打和，咁好路唔捧2.1倍半和點得呀！