多蒙特迎皇馬攞番個彩

猪拉多纳

歐聯8強次回合，德甲多蒙特主場迎戰西甲皇家馬德里，「銀河艦隊」皇馬首回合喺主場已經取得3比0巨大領先優勢，就算多蒙特可以好似上屆咁主場贏4比1，都不足以逆轉出線，對於皇馬嚟講，今仗只要取得作客入球，就等同將多蒙特推向無法翻身嘅絕境，次回合贏輸對佢哋嚟講唔係最重要，相反多蒙特教練高普承認要追番首回合失地機會唔高，但一定全力以赴求攞番個彩，何況皇馬作客德國一向表現奇差，今仗仲要讓平半過分咗，黑柴撐多蒙特下盤。

（有線62及202台周三凌晨2時45分直播）

多蒙特啱啱喺德甲反勝禾夫斯堡，呢場重大勝利令佢哋穩定咗聯賽榜次席位置，箭頭羅拔利雲度夫斯基有波入，已經喺射手榜追到同拜仁嘅文迪蘇傑平頭，多蒙特首回合作客巴拿貝唔可以取得作客入球，好大程度同呢位波蘭射手停賽有關，皆因佢係「銀河艦隊」剋星，上屆歐聯皇馬兩番作客德國全敗，羅拔仔兩場波合共喺皇馬身上取得五個入球，今晚佢喺西法倫球場復出，有決心一吐首回合無緣上陣睇住皇馬大勝嘅烏氣。雖然隊長基爾今場要停賽，但呢位老將速度已大不如前，面對行軍快速嘅皇馬，首回合已見力不從心，今仗由年輕12年嘅塞爾維亞新兵米路斯祖積取代佢擔任防守中場，黑柴相信效果隨時會更好。
4強在望 更加唔搏

皇馬啱啱喺西甲大勝皇家蘇斯達，不過C朗因為輕傷缺陣，雖然呢位王牌射手已復操，今仗可以上陣，但未必可以即刻回復十足狀態。事實上，皇馬近排忙到嘔，佢哋喺西甲爭霸形勢處下風，餘下六場波每場都係生死戰，加上下周中西班牙盃又要決戰宿敵巴塞隆拿，今場對佢哋嚟講只要攞到作客入球同埋唔大敗，就可以完成出線4強任務，去到比賽末段好難集中精神同多蒙特搏命。皇馬過去作客德國嘅歐戰比賽戰績奇差，歷來26次到訪成績係2勝6和18負，上季兩次嚟到坐滿8萬人嘅西法倫球場分別輸1比2同1比4，今晚喺冇必要贏嘅形勢下又邊度讓得起波？