皇馬多蒙特細界波

猪拉多纳

驚再慘敗求穩 羅拔仔大四喜No Way

今晚歐聯8強另一場大戰，多蒙特主場迎戰皇家馬德里。「蜜蜂兵團」首回合遙遙落後0:3，今晚次回合要反勝晉級，睇怕要等奇迹。始終皇馬歐聯經驗豐富，又有上屆作客西法倫球場慘敗陰影，今仗舊地重遊睇嚟會穩中求勝唔敢亂攻，2.45倍入球細值得捧場。

（有線62及202、中央5台周三凌晨2:45直播）

多蒙特自從放走咗馬里奧葛斯，同中場核心根度簡傷足成季，組織力下降唔少，對歐洲二線球隊就夠殺啫，但對住實力屬歐洲頂級嘅皇馬就見晒底。
多蒙特組織力跌Watt

首回合佢哋以奧巴美揚作單箭頭，配合馬高列奧斯同米希達利恩後上效果麻麻，全場只得2次中目標射門。今仗用番首回合停賽、上屆曾喺主場對皇馬食出「大四喜」嘅羅拔利雲度夫斯基，的確可以嚇吓對手，但要重演上屆入球騷就難啲喇，連佢自己都話：「入4粒呢件事已經過去，今場係一個新開始！」
賓施馬4場食白果

皇馬有3球領先優勢，今仗作客自然毋須急於進攻，始終球隊要應付多條戰線，相信歐戰經驗老到嘅教練安察洛堤會喺戰術上作調整，無謂冒險同多蒙特搏命。快翼加里夫巴利上場聯賽作客皇家蘇斯達雖有1球進帳，但另一箭頭賓施馬近4仗食白果，腳風麻麻。

相信今場皇馬會屯重兵喺後防，雖然啱啱復操嘅馬些路，最快到下星期對巴塞嘅西班牙盃決賽先至復出，但有沙治奧拉莫斯拍住比比鎮守防線，就算面對「羅拔仔」同馬高列奧斯嘅狂轟猛炸，都唔會頂唔住嘅。
巴利近3仗入4球

皇馬翼鋒加里夫巴利近3場轟入4球。

皇馬喺今屆歐聯9戰取得8勝1和不敗佳績。

多蒙特近4場主場有1勝1和2負。
銀河艦隊上盤筍

多蒙特今季表現滑落，最近連主場優勢都冇埋，今場焗攻後防隨時出現更多空位，好難頂住皇馬嘅快速反擊，「銀河艦隊」小讓平半1.9倍上盤抵玩。
首回合：多客負0:3