配搭亂過亂世佳人 第五場考腦力

猪拉多纳

　　雷神復出，好多佢忠心fans又可以大買特買，至於會唔會帶挈到大家，就真係聽天由命，佢都係人一個，唔係神仙或者神燈，唔可能一一實現大眾願望，所以，抱太大期望，未必係好事。

　　簡單講，莫雷拉場場有馬跑，但個馬場唔係佢開，呢度又唔係星洲，隻手唔會遮得晒個馬場，若然場場追住買，輸到乾塘都有之，勸告大家都係唔好太過熱情。

　　另一方面，有時各方焦點落晒雷神身上，因而令某場合睇落好似好易中，內裏可能係危機重重。呢一刻要叫大家頭腦清醒，基本上係唔可能，因為佢真係魅力沒法擋，希望做到熱情之中帶點冷靜，已經好叻。

　　今晚第五場，睇配搭真係亂過亂世佳人，一望落去，畀人感覺係雷神情歸「百年歡」，同場兩匹佢胯下取得WQ「光速銀桂」及「馬主光輝」，佢眼尾都唔望，但呢兩匹賣剩蔗配上兩大巨頭，係唔係執二攤，群星拱照莫雷拉，有冇咁單純呀？！此外，柏寶騎開「瀟洒勁龍」，亦都推庄，騎隻輸完再輸「多多心得」。上述呢幾匹馬大家點樣取捨，真係要諗清諗楚。Jack