巴塞硬撼馬體會冇優細

猪拉多纳

今晚歐聯8強次回合另一激戰，馬德里體育會返主場同巴塞隆拿再演「西甲內訌」，不過今場睇怕造唔出入球騷喇，皆因馬體會主場一向硬淨，依家又有作客入球在手，今晚睇怕都係大踢穩守突擊。巴塞嘅「球王」美斯近年對住馬體會又頻頻「食白果」，單靠「馬體會剋星」尼馬睇怕唔會多波入，一於捧1.8倍入球細！

（有線62及202周四凌晨2:45直播）
美斯近5次交手食白果

巴塞隆拿首回合喺主場同馬體會踢成1:1，形勢唔算樂觀，不過馬體會確實令巴塞鬼咁頭痕，皆因兩軍今季4次對碰都和局收場，陣中更只得尼馬曾經攻破佢哋大門。

反觀出道以嚟曾對馬體會上演3次帽子戲法嘅美斯，近5次對「床單軍團」都冇再取得士哥，似乎畀對手嘅門神泰拔高圖爾斯剋到應一應。就算尼馬今季4次對馬體會入過3粒，但靠佢一個入得幾多吖！

不過馬德里體育會都唔好得幾多，雖然上仗靠迪亞高入咗個靚絕世界波一度領先，但個入波實在帶點運氣成分，難望佢今場又再「出招」。最大鑊係上仗傷出嘅王牌前鋒迪亞高哥斯達雖然復咗操，但教練施蒙尼講明佢要有9成狀態至准落場，今仗未必踢到正選，多數後備上陣搏殺。另一傷兵阿達杜倫又未好番，對前線火力無疑係極大嘅打擊。
迪亞高哥斯達復操先任後備

就算中場堤亞高文迪斯話馬體會有個冇哥斯達在陣嘅「Plan B」，但睇佢哋上仗主場鬥維拉利爾只能1球小勝，就知呢位射手缺陣影響極大，今次對住實力更強嘅巴塞，唔係望佢哋可以數人幾粒呀？既然兩邊火力都咁唔掂，入球細就最啱數啦！
Data King：馬體會今屆歐聯不敗

‧馬體會喺今屆歐聯保持不敗。

‧馬體會今季26場主場賽事獲21勝4和1負。

‧巴塞隆拿近7戰不敗，共獲6勝1和。
乜都玩錦囊：馬體會主場勁捧「讓主」

馬體會今季喺主場勁揪得，全季各項賽事除咗輸過1場西盃畀皇馬外，就未試過輸波，雖然今仗對手係巴塞，但相信馬體會有主場威力助陣，可以好似之前4場咁保持不敗，今場仲要受讓1粒，1.67倍「讓主」捧得過。
首回合：馬客和1:1