聖羅倫素讓唔起保地花高

猪拉多纳

南美自由盃B組分組賽最後一輪，排第3嘅聖羅倫素喺主場迎戰保地花高，兩隊依家都唔肯定出到線，但作客嘅保地花高有2分優勢，只要同時間開賽嘅迪華利獨立隊贏唔到艾斯賓路拿，保地花高和波都掂，可以睇住嚟踢，對住喺自由盃啞晒火嘅聖羅倫素，受讓半一，梗係要捧1.73倍嘅下盤啦！

（開賽時間：周四早上9:00）
保地花高睇住嚟踢

聖羅倫素今季喺阿甲表現唔錯，現時以21分、較佳得失球排緊榜首，不過去到自由盃，成班波就冇晒火。佢哋過去5輪只係入到3球，依家以5分排緊第3，球迷梗係失望啦。今場佢哋要擊敗保地花高全取3分，仲要望同樣有5分嘅迪華利獨立隊失分畀榜首艾斯賓路拿，先出到線。如果聖羅倫素同迪華利獨立隊一齊贏波，有可能要計得失球，前者今場唔單止要贏，仲要大炒，要搞咁多嘢先「有機會」出線，不如專心聯賽，搏埋個次循環冠軍好過啦。

保地花高今場有中場施甸奴同守將祖利奧施薩兩名傷兵唔出得，但要頂住聖羅倫素，以現有人腳都已經足夠，所以呢個下盤撐得過。