華倫得個名冇本事讓波

猪拉多纳

歐霸盃以往真係有唔少古靈精怪嘢，直到依家喺外圍賽階段仍然不時都有異常賽果嘅賽事，去到分組賽有個別小國球隊都唔係存心爭盃，呢啲嘢行內人見慣不怪，唔係咩新鮮事。點解會有呢種情況，全因歐霸盃始終唔係高獎金賽事，叫座力遠遠唔及歐聯，球隊搵得少，自然畀到機會啲人喺度搞搞震。

不過，歐霸盃八強隊隊都熟口熟面，隊隊都有頭有面，起碼諗少瓣無謂嘢，大家揀波時唔使擔心咁多喇。今屆決賽喺祖雲達斯主場上演，呢班波實力睇落有啲超班感，自然被捧成一面倒熱門。不過，大家要留意一點，意甲水平近年不斷下滑，已經唔再係歐洲一線聯賽，祖記到底係咪真係咁叻，實在係一大疑問，而葡超勁旅賓菲加今季來勢洶洶，無論係國內定出到去打歐洲賽都非常醒神，絕對唔可以睇小。
巴素利實而不華

至於瑞士球隊巴素利亦屬一路奇兵，佢哋首回合大炒華倫西亞三蛋，踢到對手一戙都冇，但由於名氣唔及對手，今次再鬥華倫仍然有得受讓，個盤相當抵玩。以波論波，巴素利絕對不落下風，只要今場打番正常水準，至少有力保持不敗，呢隻下盤值得留意。

（有線64及203台周五凌晨3時05分直播）