「李黎」組合頂硬上

猪拉多纳

　　還記得上季曾在專欄中分析李易達馬房的搏馬手法，歸納出三個要點，第一是唔冷咪搞；第二是王牌出擊；第三是靠徒弟楊明綸砌。但由於今季情況又有不同，楊明綸一來多了支持，有告東尼照住，自然不能時時為師父效勞，二來自己又黑仔，兩次墮馬受傷，變相搞到李易達要搵其他騎師幫手，近期便造就了「李黎」這對騎練組合了。

　　今年4月6日之前，李易達與黎海榮已有五年未有合作馬贏，當時講到最近一匹頭馬已是2009年3月28日的「魄力之城」，誰會想到他們會在今年4月6日的頭場賽事，憑「大地王者」這匹20倍冷馬再度贏馬？

　　正所謂搏開有條路，前晚他們僅合作一匹「瀟洒勁龍」，話說此駒至今兩場頭馬都由柏寶取得，但不知是因為柏寶同場揀騎容廐的「多多心得」，還是李易達刻意搵黎海榮，結果「瀟洒勁龍」就改配了此子，最終更贏馬而回，爆出10倍冷門。

　　說句老實話，楊明綸上次騎「中華寶貝」墮馬，導致左上臂輕微骨裂，醫生建議他休息四至六個星期。李易達上季已因頭馬量不符合馬會發牌最低要求，接了警告信，今季又欠六場頭馬才可達標，不可能等徒弟出山救亡了，現時搵到黎海榮這支扶手棍，一定會搏盡。(洋超)