阿聯爭做老二打爆機

猪拉多纳

澳職終於嚟到最後一輪常規賽！亞軍同第六位嘅爭逐形勢都好混亂，基維爾同布歷捷斯呢兩位前英超球星，已經先後宣布將於球季結束後掛靴。換言之大家呢兩日追住球彩台直播，就會睇到兩位嘅告別戰。

不過，唔捨得係另一回事，以波論波，妹頭就唔畀面布歷捷斯効力嘅紐卡素噴射機，寧願撐阿德萊德聯客勝好過！上星期「阿聯」雖然主場都贏唔到已別無所求嘅墨爾本雄心，但睇得出佢哋一直好落力，去到補時階段逼和對手時，成班球員開心到贏咗冠軍咁，教頭甘巴爾高興到震！因為依家四隊爭緊亞軍嘅球隊：中岸水手、西悉尼流浪者、阿德萊德聯同墨爾本勝利其實只係相差一分，「阿聯」今日呢場冇得諗咁多，總之要贏，再望之後「西悉尼」同「水手」作客失分就完成偉業！甘巴爾若果領軍首季就贏到個亞軍返嚟，就不負咁多球迷支持佢帶領澳職明星隊出戰祖雲達斯喇！

小妹睇好「阿聯」呢場客勝，都係因為佢哋兩位中場法比奧費拉拿同卡路斯卡狀態唔錯，再加埋前線有摩拉利斯紐曼，攻力十足！尤其係卡路斯卡下半季表現好出色，帶動「阿聯」成條前線升呢。
可能係布歷捷斯告別戰

「噴射機」依家排第七，打入季後賽機會唔大，除咗要望自己贏多幾球外，仲要望FC悉尼星期日主場輸多幾粒畀珀斯光輝，難度比「阿聯」爭亞軍高得多啦！再加埋噴射機主場戰績係全澳職尾二，睇嚟連布歷捷斯都會當呢場係紀念賽，心態自然亦唔夠對方咁有爭勝心！

（有線64及203台周五下午5時30分直播）
妹頭推介

紐卡素噴射機Vs阿德萊德聯

主客和：客勝