伊斯特尼斯搶韁吼半場大

猪拉多纳

經過周中歐聯、歐霸激戰過後，今晚又輪到二線波做主打，阿King睇中法乙伊斯特尼斯主場迎戰卡昂。前者深陷護級漩渦，再唔發力隨時降班收場，不過卡昂亦為爭升班搏到盡，兩軍都咁有戰意，搶分心切早早入局，隨時於初段就有入波，轉玩半場大更佳。

（周六凌晨2時開賽)

法乙最尾3隊要降班，現時下游形勢七國咁亂，聯賽剩番7輪，就算排第14嘅查多魯，亦只係多尾3嘅拉瓦勒4分，仲未夠分上岸，更何況係排尾4嘅伊斯特尼斯呢？呢班波一向靠主場搵食，近七次喺自己地頭出戰僅一敗，為搶分必定豁出去搶攻，但睇番上仗作客一哥梅斯反勝為敗，表現係幾落力，不過後防唔集中問題仍未有解決，只怕前面入埋唔夠後面輸。
對手卡昂爭前3必搏

另一邊廂法乙最高嗰3隊升班，卡昂位列第4，只差第3嘅尼奧特3分，不過有打少1場嘅優勢，假若佢哋往後賽事繼續贏波，一定能趕上升班尾班車，因此爭勝決心絕不遜於伊斯特尼斯，況且前鋒杜咸姆近5仗入5粒，腳風勁順，作客都唔赦你，預計雙方一開波就搏拳爭士哥，如果大家想早啲瞓的話，半場大乃不錯選擇。

至於挪超方面，辛尼斯主場硬撼白蘭恩，辛軍有隊長兼防中史祖斯域坐波監，對防線影響極大，白蘭恩開咧兩連敗，但表現明顯有進步，為開齋洗頹風必定搶攻，入球大好路。至於荷乙方面，多德勒支上仗榜首大戰對威廉二世輸波，後者藉住日前於補賽贏波升上榜首，多德勒支為保爭標機會，今返主場遇上奧斯不容再失，實搵呢支弱旅祭旗，不妨直取讓球主勝。