車仔踩住史雲斯

猪拉多纳

爭冠直路1分都不能少

車路士剛喺歐聯奇迹殺入4強，主帥莫連奴又被擺上神枱，連雪到硬晒嘅丹巴巴亞都有貨交，真係有料又有運，但佢哋英超爭冠形勢係榜首3雄中最差，而今晚正好利物浦要同曼城交鋒，而距離歐聯4強戰鬥馬體會仲有兩星期時間，車仔當然唔錯過呢個機會，作客自由球場當然要全力爭勝，實行踩住史雲斯上去，讓到半一都照捧2倍上盤！

（now 621周日晚11時7分直播）
歐聯晉級士氣返晒嚟

車路士上年1月喺英聯盃4強次回合作客史雲斯，當時輸緊兩粒唔贏唔得，踢到尾段雙方仍然互交白卷，主隊執波仔查理摩根連環出招揼波鐘，車仔主將夏薩特躁爆兜腳踢埋去，最終領紅被逐。呢次「執波風波」令兩軍陣營一度處於緊張關係，主角夏薩特於歐聯傷出，今仗相信唔會落場，唔知另一主角查理摩根會唔會再喺場邊再搞搞震呢？

英超爭標依家去到最後衝刺，車路士對上兩場作客聯賽先後不敵水晶宮同阿士東維拉，似有腳軟之勢，而失分亦比曼城同利物浦多，失去爭標主導權。不過，隨住上場歐聯大逆轉反勝巴黎聖日耳門後，成班波個勢返晒嚟，莫連奴孤注一擲搵埋大後備前鋒丹巴巴亞建奇功，神級調動贏盡掌聲，見到丹巴巴亞賽後受訪時眼濕濕，真係好感動。家陣班波夠晒齊心，即使冇夏薩特相信影響唔大。由於同晚利物浦主場要惡鬥曼城，正係車仔追貼兩支競爭對手嘅黃金機會，相信莫連奴亦唔會保留，排出最強陣誓要踩住史雲斯上，攞足3分。
遇強即屈受讓信唔過

史雲斯方面，今季戰績令人極度失望，主要因為王牌球員米捷長期受傷，近期呢位「巴打」傷愈復出，班波踢落亦稍有改善，射手韋菲特邦尼起碼唔使孤軍作戰，前線有返多少威脅。史雲斯所有主將都可候命，但佢哋今季主場遇強手冇乜好下場，面對曼聯、阿仙奴、曼城、愛華頓同熱刺等前列球隊全部輸晒，呢次相信都係頂唔住車仔，客W同上盤都係穩陣之選。
領隊Chit Chat

蒙克(史雲斯)：莫連奴係頂級教頭，有機會挑戰呢位巨人絕對係難得機會，畀我可以從中學習。

莫連奴(車路士)：史雲斯踢法悅目，主場特醒，呢點車仔感受好深！佢哋冇護級壓力，但仍會盡力搶分，我哋要小心！