基達菲搶分形細有利

猪拉多纳

馬體會搏完歐聯未回氣

氣勢如虹嘅西甲一哥馬體會，今晚喺聯賽作客護級分子基達菲，唔好以為場波強弱懸殊，馬體會啱啱喺歐聯8強淘汰巴塞全場喪跑，搏得超盡回唔切氣，今仗必定拖慢節奏嚟踢，況且「野獸」迪亞高哥斯達未必出得，攻力有所削弱，對住死守嘅基達菲唔慌多波入，細盤有買趁早。

（now 632周一凌晨1時直播）

「床單兵團」馬體會不愧為鐵血之師，上周中歐聯8強次回合全場逼搶，搞到技術細膩嘅巴塞一戙都冇，成功殺入4強絕非僥倖，但係佢哋全場咁樣逼搶，消耗咗唔少體力，球員唔係機器，邊有咁快回到氣呀？由於今仗只係作客尾三嘅基達菲，預計主帥施蒙尼會作出輪換，並會叫班手足唔使谷得咁盡，盡量拖慢節奏睇定嚟食。

至於早排受傷嘅箭頭迪亞高哥斯達已經隨隊操練，但只係輕鬆跑步，睇嚟屬啱啱好番，上周中對巴塞咁緊要嘅大戰，施帥都錫住「野獸」冇派佢上陣，今場畀佢抖多場絕對唔奇，但冇咗今季聯賽轟入25粒嘅「迪哥」，連攻擊中場阿達杜倫都倦勤，攻力難免打折扣。
近６對賽基達菲食蛋

基達菲要搶分護級，不過佢哋近7仗有5場冇士哥，今仗仲有迪亞高卡斯度及謝美加維蘭等進攻核心因傷未必能披甲，想攻都有心冇力，加上之前6次對住「床單兵團」未贏過之餘，竟然一球都入唔到。既然馬體會攰到爆，作客攻力唔掂玩死守嘅基達菲未必咬得入，就算贏都隨時重演之前歐聯過後以1比0擊敗維拉利爾及愛斯賓奴嘅好戲，客Ｗ得1.35倍冇肉食，斯維寧捧有1.68倍嘅入球細。