歐聯名帥鬥智夠精彩

猪拉多纳

歐聯4強塵埃落定，拜仁慕尼黑出戰皇家馬德里，馬德里體育會硬撼車路士，到時先同大家深入分析。講番佢哋喺8強激戰過程，拜仁同皇馬人才濟濟，大熱晉級乃實至名歸。至於車仔及馬體會能夠殺退強敵，雙方主帥莫連奴同紅褲子出身嘅施蒙尼無論喺賽前部署，抑或臨場應變，都展示出大師級風範，當車仔喺次回合攻入第二球，出線在望之際，莫帥變身Running Man狂奔50碼衝向球員度，唔係忘情慶祝，而係向丹巴巴亞同費蘭度托利斯面授機宜，點樣返後企位做好防守，完全冇畀勝利沖昏頭腦，認真冷靜。

馬體會教頭施蒙尼仲心水清，巴塞一向從門將喺後場開始組織進攻，佢睇準對方正選門神域陀華迪斯重創倦勤，後備龍門賓度又腳法麻麻，敢於全面壓前做逼搶，搞到「地上最強」陣腳大亂，整入一粒即全軍退守，等待機會打反擊，呢類打風波能夠早早佔到先機，非常着數，施帥果然深謀遠慮。
莫耶斯白蘭斯唔夠班

相反曼聯、巴黎聖日耳門、巴塞隆拿齊齊出局，教頭莫耶斯、白蘭斯及馬天奴喺戰略及臨場調動方面，明顯Out coach and out witted（未夠班及唔夠機智），難辭其咎，多蒙特嘅高普就係巧婦難為無米炊。歐聯水準極高，淨係睇一眾名帥鬥智鬥力都夠晒精彩，再次證明教練有冇料到，隨時成為球隊出線定落敗嘅關鍵。
金句：出線及落敗的分野，一個字講晒：Coach