紅軍 曼城爭標做「大」事

猪拉多纳

決戰英超之巔

英超爭冠「大」戰爆發！今晚英超焦點落晒喺利物浦迎戰曼城場波度，暫列「一哥」嘅紅軍坐鎮晏菲路，加上希爾斯堡慘劇25周年臨近，領隊羅渣士話明要將英超冠軍獻畀96位死難者，球員戰意肯定高昂；不過對家「藍月亮」火力驚人，「神箭」阿古路又可以復出，鋒力唔會輸蝕畀利物浦嘅「SAS」，兩軍對攻，1.48倍入球大熱都照捧！（now621台周日晚8:37直播）

目前聯賽9連勝嘅利物浦鋒力冠英超，今季平均每場入2.72球，比曼城嘅場均2.7球仲要多！目前剩低5輪比賽，紅軍要打破車路士喺2009至10賽季所創嘅單季入103球紀錄，絕對唔難！今仗大戰啱啱撞正希爾斯堡慘劇25周年紀念前夕，主場嘅利物浦球迷當然會比平日更落力打氣、球員亦肯定會更加搏命啦！
利記快翼恰死迪米捷利斯

當選英超3月份最佳球員嘅謝拉特同蘇亞雷斯，近6場已經夾手夾腳入咗12球，仲有倒戈嘅史杜列治同史達寧兩隻快翼，對住迪米捷利斯呢件龜速中堅勁有着數，咪忘記佢哋仲有帶刀侍衞史卡迪爾，「S4」火力全開狂轟曼城條防線，入番幾粒照計唔係難事。

不過客隊曼城亦唔係善男信女，最緊要嘅係今仗有久休嘅阿古路復出嘛！呢位「藍月亮」No.1前鋒雖然抖咗一排，但仍然累積咗15球進帳，射術唔會差得過「哨牙蘇」 ！比歷連尼仲爆料，話阿古路其實已經如常操練咗1星期，今仗好大機會正選上陣，叫紅軍小心啲喎！
舒活預言：呢場波有10個入球！

咁又係呀，除咗阿古路（Aguero），耶耶托尼（Yaya）同大衞施華（Silva）都係後上Goal手，「SAY」嘅殺傷力唔會差得過利物浦嘅「S4」，照計可以延續近6次作客晏菲路5場有波入嘅走勢；睇埋兩軍近6次交手，有5次至少出現3個入球，熱刺領隊舒活仲誇張到話預計呢場波會出現10個入波添，咁嘅環境，唔係唔捧大吓話！
Data King：謝四YaYa死球專家

‧曼城近6次造訪利物浦，只得5和1負。

‧計埋主場及盃賽在內，「藍月亮」近3季9次鬥紅軍，有7次不敗。

‧謝拉特（12球）及耶耶托尼（10球）分別係今季英超攻入最多罰球及12碼嘅球員。