貝迪斯西維爾搏錘做大戲

猪拉多纳

今晚西甲榜尾貝迪斯主場迎戰西維爾，貝迪斯上半季發波瘟，導致球隊喺聯賽大落後，依家惟有場場都搏錘。踢法咁進取，對住攻優於守嘅西維爾，入球實唔會少，撐1.72倍入球大啱數。

（TVB13、now632台周日晚6:00直播）

今輪聯賽開始前，貝迪斯同尾四嘅華拉度列有9分差距，聯賽得番6場，護級路當然難行。貝迪斯近3仗錄得1勝2負射入5球，全部開出入球大，原因好簡單，皆因佢哋每場都以3分為目標。前線加強攻擊力，後面自然暴露更多空位！前線孖寶魯賓卡斯度同佐治摩連拿狀態唔錯，可以擔起入球重責，可惜球隊防線持續不濟，入埋都唔夠輸先搞到戰績咁差。
西維爾兩仗入8球

對家西維爾狀態大勇，佢哋喺周中歐霸8強次回合成功扭轉形勢，4:1擊敗葡萄牙勁旅波圖，兩回合計以4:2淘汰對手晉級4強。連同上周聯賽同樣以4:1擊敗愛斯賓奴，2仗轟入8球。前線卡路士卡巴、加美路等人都有進帳，特別係好波之人加美路腳風甚佳，呢兩場一共入咗3粒，今晚大有機會喺貝迪斯條豆腐防線身上取得「士哥」，入球大自然成為呢場波嘅心水之選啦！